Blogs

Die ANC Jeugliga se uitlatings saai ‘n tipe onmin wat ons nie nou nodig het nie.

Ek is ‘n baie trotse Suid-Afrikaner. Ek geniet die verskillende bevolkingsgroepe en ek dink ons is almal ryker, beter mense omdat ons die voorreg van ware diversiteit daagliks leef. Ek wil ons natuur beskerm, ek wil belasting betaal sodat alle burgers lopende water en elektrisiteit kan hê, en ek wil hard werk sodat ons ekonomie kan groei en ons in staat kan stel om ons kinders te voed en te klee.

So dit maak my (en ‘n groot klomp ander wit, bruin en swart mense) vies as iemand soos Malema so verskriklik opruiend is. “Vermoor die boere, hulle is verkragters”. Sjoe. Dit mag dalk waar gewees het so paar dekades terug, maar dis nou sommer onnodig om sulke uitlatings te maak.

Wat my tog bekommer is die feit dat dit wil blyk asof daar ‘n groot klomp mense is daar buite wat met Malema saamstem.
En dit laat my wonder, mis ons dalk iets? Is daar erens ‘n taal/kommunikasie/telefoontjie probleem? Want die man is ‘n mondstuk vir miljoene en op die oomblik lyk dinge nie baie goed vir ons vetgevoerde, oorgemaklike middelklasse nie.

Aan die een kant voel ek half dat die oorgrote meerderheid van ons land beslis rede het om te kla. Die rykdom van die land is steeds in die hande van ‘n baie klein groepie en daagliks kripeer miljoene.

Maar aan die ander kant weet ek ook dat die sosiale en ekonomiese probleme in ons land tyd en samewerking gaan vat om te genees – nie woede en haatspraak nie.

Dit maak in elk geval nie saak hoe jammer ek die armes, en die onopgevoedes en die moedeloses kry nie. As die rewolusie kom is ons almal diep in die sop.